Eнгeний талаарх eeр ойлголт

Долоо хоног тутмын Цаг Төр сэтгүүлийн дараа долоо хоногийн дугаарын өмнөх үгийг бичиж өгөөч хэмээн хүсэлт гаргасны дагуу доорхи зүйлийг сараачлаа. Хавтасны сэдэв нь өнгө гэсэн тул түүнтэй нь уялдуулан бичих гэтэл магтаал, уран сайхны халилдаа үнэн авьяасгүйгээ дахин мэдэрлээ. Үүний оронд нэг хүнийг муул гэсэн бол яасан сайн бичиж байгаа бол...

Энэ сэтгүүлийг дэлгэн уншиж буй эрхэм уншигч Та сайн байна уу?

Өнгө бол дэлхийн хүн төрөлхтний нийтлэг хэл. Бидний хэл заншил, дохио зангаа хүртэл өөр өөр байх боловч өнгөөр бид ойлголцож, өнгөөр бид өөрсдийгөө орчуулгагүйгээр илэрхийлж чаддаг. Бид өнгийг бүр өмчилж аваад, өөрийнхөө хувцаслалт, унаа тэрэг, байр сууцныхаа засал чимэглэлийг хүртэл тэр л өнгөөрөө гоёхыг хичээдэг. Өнгө бидний амьдралын салшгүй томоохон хэсэг. Харин таны харж байгаа цэнхэр өнгө надад яг тийм цэнхэрээр харагддаг уу? Хар өнгө, өнгө мөн үү? Эсвэл зүгээр л өнгөгүй газрыг ноёлосон сүүдэр юм уу? Тэгвэл цагаан? Өнгө дуулж бүжиглэж, уйлж, аврал эрэн хашгирч, эс бөгөөс амар тайвны дууч лугаа адил аашилдаг гэдэгтэй та санал нийлэх үү? Өнгө байхгүй байсан бол энэ дэлхий ямар байх байсан бол? Өнгийг хэн бүтээсэн юм бол оо?

Өнгө нь хүний сэтгэл хөдлөл, зан төлөв, хоол идэх дуршил, хараа, бэлгийн дур хүсэлд нөлөөлөөд зогсохгүй урлаг, бизнес, дизайны гол төлөөлөгч болдог билээ. Уншигч танд ч бас өнгөний талаар өөрийн гэсэн үзэл баримтлал, байр суурь байгаа. Та энэ дугаар дээр өгүүлэх өнгөний талаарх сонирхолтой дэлгэрэнгүй нийтлэлүүдийг уншингаа, өнгөний тухай ойлголтоо нэмэгдүүлж, бидний өдөр бүрийн амьдралыг маань сонирхолтой, адал явдалтай болгож байдаг өнгөний тухай дахин нэг эргэцүүлэн бодохыг урьж байна.

Таны амьдрал тэнгэр мэт цэлмэг, тэнгис мэт агуу байх болтугай.

Сэтгүүлч Пунцагийн Баярмагнай