Нойр хулжив, ном санагдав

Нойр хүрдэггүй, элдвийг бодон ийш тийш хөрвөх эгшинд дээр коллежид байхдаа уншиж байсан ном санагддаг юм аа. Массачусетсийн IT Media Lab-ийг үндэслэгч, Wired сэтгүүлд колумнист хийдэг байсан Николас Негропонте бичсэн “Being Digital” хэмээх ном юм. Мөн тэрбээр Хүүхэд Бүрт Нэг Лаптоп төслийг санаачлан удирдаж байгаа. Энэ шугамаар магадгүй манай түшмэдүүдтэй уулзсан санагдаж байна.

Харин түүний аль 1995 онд бичсэн мэдээллийн технологийн ирээдүй болон энэ нь хөгжил дэвшилд ямар нөлөөтэй болох талаар өгүүлсэн бяцхан ном байгаа. Түүнчлэн энэ нь бидний ирээдүйн өдөр тутмын амьдралд хэрхэн нөлөөлөх талаар таамаглалууд дэвшүүлсэн нь ихэнх нь байгаа оноод байгаа билээ. Монголоор гарсан эсэхийг мэдэхгүй, ямартай ч хуучин ч гэсэн уншихад илүүдэхгүй ном. Электрон хэлбэрээр энэ тэндээс татаж авахаар байх шиг байна лээ.

Дашрамд хэлэхэд өнөөх Николас 100 долларын лаптопныхоо хоёрдахь хувилбарыг дараа оноос гаргахаас гадна, 75 орчим долларын үнэтэй электрон номыг санал болгох гэж байна. Саяхан болсон хэвлэлийн презентаци дээр тэрбээр хэлэхдээ “бидний сүүлчийн хоёр жил шахамын хугацаанд сурсан зүйл нь бол ном унших нь түлхүүр юм. Зарим хүмүүс надад хүүхдүүдэд зүгээр л гар утас өгчихгүй юм уу гэж зөвлөдөг. Энэ жил л гэхэд 1.2 миллиард гар утас үйлдвэрлэгдэх бөгөөд хөгжиж буй орнуудад томоохон өөрчлөлтийг авчирч байна. Гэвч гар утас бол сургалтын хэрэгсэл биш юм. Дараа үеийн лаптоп бол ном байх ёстой” хэмээн хэлжээ.

Хоёр хавтастай, точ скрин бүхий энэ электрон номыг 2010 оноос үйлдвэрлэж эхлэхээр төлөвлөж байгаа юм байна.