Шал ондоо юм аа

Готовын Аким гуайг би сэтгэлээсээ хүндэлж байдаг цөөхөн хүмүүсийн нэг. Зунаас хойш намайг номын сандаа орчих гэж хоёр асууж үзээд, сая бол бараг загнах янзтай. Удахгүй Чингисийн тухай нэг номоо хэвлүүлэх гэж байгаа юм байна. Тэгсэн орчуулагч, гүүш хүн гэдэг ондоо юм аа. “Genghis Khan: Life, Death and Resurrection” гэдэг Жон Мэний номыг мань нь бол “Чингис Хаан: Амьдрал, Үхэл, Дахин Амилалт” гэх мэтээр орчуулж байхад Аким мэргэн “Чингис Хаан: Амьдарсан нь, Хальсан нь, Амилсан нь” гээд л орчуулж байгаа юм даа. Ёооё, ёстой хэлэх ч үг алгаа. Би бас түүнийг нь өөриймшүүлчих санаатай, Сайнаад болохоор “Амьдрахуй, Халихуй, Амилахуй” энэ тэр болгочихжээ бас.

Арваа төгсөөд удаагүй байхдаа анхныхаа сонинг гаргаж, тэр үедээ бол тун додигор амьтан явж байж билээ. Түүгээр зогсохгүй бас англиас, оросоос худал үнэн ч гэсэн орчуулга хийчих санаатай. Нэг сонингынхоо дугаарыг аавдаа үзүүлж, магтаал урамшууллын үг сонсчих санаатай, англиас орчуулсан хэсгээ үзүүлэв. Аав ч овоо доо гэсэн байртай үзэж байснаа дууддаг юм аа. Аав орон дээрээ хажуулаад, би хажууд нь сөхөрч суугаад орыг нь хоёр тохойгоороо түшинэ. Ер нь би аавтайгаа ийм байрлалтайгаар олон ч зүйл сонссон доо. Тэгсэн “модоор хийсэн байшинг юу гэдэг юм бэ?” гэдгийн. Гайхаж орхив. Юуг асуугаад байгааг нь хартал улаан тогооны бариул чинь wooden house гэдэг үгийг “модоор хийсэн байшин” гээд хусчихсан байгаа юм даа. Ядаж модон байшин, ямаа минь ээ. Ээ дээ, тэгэхэд урам хугараагүй, харин ч даан ч яавдаа гэсэн зэмлэлийг зуугийн хадаастай хамт толгой дундуураа шааж байж билээ. Аав бол тэгээд сайн байна ч гээгүй, болоогүй байна ч гээгүй л санагддаг юм даа.