Би амьтан

Амьтны хүрээлэн миний дотор амьдарна. Тэнд янз бүрийн араатан амьтнаас авахуулаад, хорхой шавьж хүртэл байна. Эртээд би нохой болоод шөнөжингөө хуцсан. Хоолой сөөгөөд хуцах гэхэд дуу ч гарахаа больтлоо хульх нь буусан. Саваагүй нохой байсан.

Хааяа би арслан бас бар болно. Энэ үедээ бол хэнийг ч юуг ч тасар татан хаяхад бэлэн. Энэ үедээ хамаг хүчээ хэдхэн хоромын дотор гарган, юуг л бол юуг тасчин хаяхаар архиран хүрхрэнэ. Дараа нь яалаа, санахгүй байна. Гэвч намайг зоопаркын ажилчид буудаж алаагүйг бодоход тэгэсгээд номхорсон бололтой. Байз, Африкийн сафарид байсан биш билүү. Ямартай ч хулгайн анчдад ч буудуулаагүй л юм байна.

Уржигдар орой би хүйтэн могой болсон. Анх удаагаа биш л дээ. Гэхдээ могой шиг атиралдсан, гуринхалсан, шургасан, шургалсан. Тэгээд хүрээлэнгээс хөөгдсөн. Хэзээ эргэж орох юм бүү мэд.

Бас би хаа сайгүй бааж байдаг ялаа. Би амттай, сайхан харагдсан газраа буух бөгөөд буцаад хөөрөхдөө бааж орхидог бузар амьтан. Ялааны алуур барьсан, сонины цаас хуйлсан сүрэг хүмүүс намайг намнахаар араас, урдаас, дээрээс зэрэг дайрч байна. Нисэх хэрэгтэй.